Saturday, March 29, 2025
ਨਵੀਂ ਦਿੱਲੀ, 4 ਮਈ 2025 — ਇਜ਼ਰਾਈਲ ਦੇ ਤੇਲ ਅਵੀਵ ਹਵਾਈ ਅੱਡੇ ਨੇੜੇ ਐਤਵਾਰ ਨੂੰ ਹੋਏ ਮਿਜ਼ਾਈਲ ਹਮਲੇ ਤੋਂ ਬਾਅਦ, ਏਅਰ ਇੰਡੀਆ ਦੀ ਦਿੱਲੀ ਤੋਂ ਤੇਲ ਅਵੀਵ ਜਾ ਰਹੀ ਉਡਾਣ AI139 ਨੂੰ ਅੱਧ ਰਾਹੇ ਵਿੱਚ ਅਬੂ ਧਾਬੀ ਵੱਲ ਮੋੜਨਾ ਪਿਆ। ਇਹ ਹਮਲਾ ਉਸ ਵੇਲੇ ਹੋਇਆ ਜਦੋਂ ਉਡਾਣ ਤੇਲ ਅਵੀਵ ਵਿੱਚ ਉਤਰਨ ਤੋਂ ਘੱਟੋ-ਘੱਟ ਇੱਕ ਘੰਟਾ ਦੂਰ ਸੀ ਅਤੇ ਜਾਰਡਨ ਦੇ ਹਵਾਈ ਖੇਤਰ ਵਿੱਚ ਸੀ।
ਮਿਜ਼ਾਈਲ ਹਮਲੇ ਦੇ ਫੌਰਨ ਬਾਅਦ, ਉਡਾਣ ਨੂੰ ਅਬੂ ਧਾਬੀ ਵੱਲ ਮੋੜਿਆ ਗਿਆ ਜਿੱਥੇ ਉਹ ਸੁਰੱਖਿਅਤ ਢੰਗ ਨਾਲ ਉਤਰੀ। ਏਅਰ ਇੰਡੀਆ ਨੇ ਐਲਾਨ ਕੀਤਾ ਕਿ ਉਡਾਣ ਨੂੰ ਜਲਦ ਹੀ ਦਿੱਲੀ ਵਾਪਸ ਲਿਆਂਦਾ ਜਾਵੇਗਾ। ਤੇਲ ਅਵੀਵ ਤੋਂ ਦਿੱਲੀ ਆਉਣ ਵਾਲੀ ਉਡਾਣ ਵੀ ਰੱਦ ਕਰ ਦਿੱਤੀ ਗਈ ਹੈ। ਏਅਰ ਇੰਡੀਆ ਨੇ 6 ਮਈ 2025 ਤੱਕ ਆਪਣੀਆਂ ਸਾਰੀਆਂ ਇਜ਼ਰਾਈਲ ਉਡਾਣਾਂ ਨੂੰ ਅਸਥਾਈ ਤੌਰ ‘ਤੇ ਮੁਅੱਤਲ ਕਰ ਦਿੱਤਾ ਹੈ।
ਇੱਕ ਬਿਆਨ ਵਿੱਚ ਏਅਰ ਇੰਡੀਆ ਨੇ ਕਿਹਾ:
“3 ਮਈ ਨੂੰ ਦਿੱਲੀ ਤੋਂ ਤੇਲ ਅਵੀਵ ਜਾ ਰਹੀ ਉਡਾਣ AI139 ਨੂੰ ਬੇਨ ਗੁਰੀਅਨ ਹਵਾਈ ਅੱਡੇ ਨੇੜੇ ਹੋਏ ਹਾਦਸੇ ਕਾਰਨ ਅਬੂ ਧਾਬੀ ਵੱਲ ਮੋੜ ਦਿੱਤਾ ਗਿਆ। ਉਡਾਣ ਆਮ ਤਰੀਕੇ ਨਾਲ ਉਤਰੀ ਅਤੇ ਸੁਰੱਖਿਅਤ ਤੌਰ ‘ਤੇ ਦਿੱਲੀ ਵਾਪਸੀ ਕਰੇਗੀ। ਯਾਤਰੀਆਂ ਅਤੇ ਸਟਾਫ ਦੀ ਸੁਰੱਖਿਆ ਸਾਡੀ ਪਹਿਲੀ ਤਰਜੀਹ ਹੈ, ਇਸੇ ਲਈ ਤੇਲ ਅਵੀਵ ਦੀਆਂ ਸਾਰੀਆਂ ਉਡਾਣਾਂ ਤੁਰੰਤ ਪ੍ਰਭਾਵ ਨਾਲ 6 ਮਈ ਤੱਕ ਮੁਅੱਤਲ ਕੀਤੀਆਂ ਜਾਂਦੀਆਂ ਹਨ।”
ਉਹਨਾਂ ਕਿਹਾ ਕਿ ਜ਼ਮੀਨ ‘ਤੇ ਮੌਜੂਦ ਸਟਾਫ ਯਾਤਰੀਆਂ ਦੀ ਮਦਦ ਕਰ ਰਿਹਾ ਹੈ ਅਤੇ ਉਨ੍ਹਾਂ ਲਈ ਵਿਕਲਪਕ ਪ੍ਰਬੰਧ ਕੀਤੇ ਜਾ ਰਹੇ ਹਨ।
ਐਤਵਾਰ ਨੂੰ, ਯਮਨ ਦੇ ਹੂਤੀ ਬਾਗ਼ੀਆਂ, ਜੋ ਈਰਾਨ ਦੀ ਹਮਾਇਤ ਨਾਲ ਕੰਮ ਕਰਦੇ ਹਨ, ਵੱਲੋਂ ਦਾਗੀ ਗਈ ਮਿਜ਼ਾਈਲ ਨੇ ਤੇਲ ਅਵੀਵ ਦੇ ਮੁੱਖ ਹਵਾਈ ਅੱਡੇ ਨੇੜੇ ਧਮਾਕਾ ਕੀਤਾ। ਹਮਲੇ ਨਾਲ ਹਵਾਈ ਅੱਡੇ ‘ਤੇ ਧੂੰਏਂ ਦੇ ਗੁਬਾਰ ਛਾ ਗਏ, ਲੋਕ ਦਹਿਸ਼ਤ ਵਿਚ ਚੀਕਾਂ ਮਾਰਦੇ ਅਤੇ ਥਾਂ-ਥਾਂ ਭੱਜਦੇ ਦੇਖੇ ਗਏ।
ਇਸ ਹਮਲੇ ਕਾਰਨ ਜ਼ਮੀਨ ਵਿੱਚ ਡੂੰਘਾ ਟੋਆ ਬਣ ਗਿਆ ਅਤੇ ਨੇੜੇ ਦੀ ਸੜਕ ‘ਤੇ ਮਿੱਟੀ ਖਿਲਰ ਗਈ। ਇਸ ਦੌਰਾਨ ਇਜ਼ਰਾਈਲ ਦੇ ਕਈ ਹਿੱਸਿਆਂ ਵਿੱਚ ਹਵਾਈ ਹਮਲੇ ਦੀ ਚੇਤਾਵਨੀ ਲਈ ਸਾਇਰਨ ਵੱਜਣ ਲੱਗੇ।
ਇਸ ਮਿਜ਼ਾਈਲ ਹਮਲੇ ਤੋਂ ਕੁਝ ਘੰਟੇ ਪਹਿਲਾਂ, ਇਜ਼ਰਾਈਲ ਦੀ ਕੈਬਨਿਟ ਗਾਜ਼ਾ ਵਿੱਚ ਫੌਜੀ ਕਾਰਵਾਈਆਂ ਨੂੰ ਹੋਰ ਤੇਜ਼ ਕਰਨ ਬਾਰੇ ਵੋਟਿੰਗ ਕਰ ਰਹੀ ਸੀ। ਉਥੇ ਫੌਜ ਨੇ ਹਜ਼ਾਰਾਂ ਰਿਜ਼ਰਵ ਫੌਰਸਾਂ ਨੂੰ ਤਿਆਰ ਕਰ ਲਿਆ ਹੈ।
ਇਸ ਸਾਰੇ ਘਟਨਾ ਚੱਕਰ ਦੇ ਵਿਚਕਾਰ, ਏਅਰ ਇੰਡੀਆ ਵੱਲੋਂ ਲਿਆ ਗਿਆ ਸੁਰੱਖਿਆ ਸੰਬੰਧੀ ਕਦਮ ਸਹੀ ਸਮੇਂ ਤੇ ਕੀਤਾ ਗਿਆ ਇਕ ਵੱਡਾ ਫੈਸਲਾ ਸਾਬਤ ਹੋਇਆ।
